इच्छाखबर संवाददाता
चितवन : चितवनमा मोटरसाइकल दुर्घटना हुदाँ दुई जनाको मृत्यु भएको छ । जिल्ला प्रहरी कार्यालय चितवनका अनुसार मृत्यु हुनेहरुमा मोटरसाइकल चालक नवलपुरको गैंडाकोट नगरपालिका ५ काङग्रेसचोक बस्ने बर्ष २६ को रबिन थापा र सोही मोटरसाइकलमा पछाडी बस्ने लमजुङको दुधपोखरी गाउँपालिका ६ बस्ने बर्ष अन्दाजी ४० को पुर्ण बहादुर गुरुङको मृत्यु भएको हो ।
शहिदचोकबाट पोखरा बसपार्क तर्फ जाँदै गरेको बागमती प्रदेश ०६–००२ प३१४५ नम्बरको एनएस मोटरसाइकल आज बिहान अन्दाजी १ : २० बजेका समयमा भरतपुर महानगरपालिका २ लिलाचोकस्थित भित्रि सडकमा आफै अनियन्त्रित भएर दुर्घटना भएको जिल्ला प्रहरी कार्यालय चितवनले जनाएको छ । दुर्घटनामा घाइते भएका उनिहरुको नयाँ मेडिकल कलेजमा उपचारको क्रममा मृत्यु भएको हो । मोटरसाइकल प्रहरीको नियन्त्रणमा रहेको छ ।
