इच्छाखबर संवाददाता
आँबुखैरेनी : तनहुँको आँबुखैरेनीमा आज दिउँसो दुई छुट्टाछुट्टै सवारी दुर्घटनामा एकको मृत्यु र ११ जना घाइते भएका छन् । जिल्ला प्रहरी कार्यालय तनहुँका अनुसार मुग्लिनतर्फबाट डुम्रेतर्फ गइरहेको ग १ ख ९४०२ नंबरको यात्रुबाहक बस आँबुखैरेनी २ र ३ जोड्ने खहरेखोलाको पुलबाट खस्दा बसमा सवार १५ जना मध्य ११ जना घाइते भएका छन् ।
दुर्घटनाका घाइते यात्रुको स्थानीय आँबुखैरेनी अस्पतालमा उपचार भइरहेको प्रहरी नायब उपरीक्षक दीपककुमार रायले जानकारी दिनुभयो । साथै आँबुखैरेनीकै नारीघाटमा बस र मोटरसाइकल एक आपसमा ठोक्किँदा मोटरसाइकल यात्रुको घटनास्थलमै मृत्यु भएको छ ।
यसैबिच दिउँसो दुई बजे ग १ ख ७१४५ नम्बरको बस र विपरीत दिशातिरबाट आएको बा ९१ प २४६७ नंबरको मोटरसाइकल ठोक्किँदा मोटरसाइकल चालक आँबुखैरेनीमा सुनचाँदी व्यवसाय गर्दै आएका अश्विन सुनारको मृत्यु भएको प्रहरी नायब उपरीक्षक रायले जानकारी दिनुभयो ।
