इच्छाखबर संवाददाता
काठमाडौं : मुगुमा यात्रुबाहक बस दुर्घटना हुँदा २४ जनाको मृत्यु भएको छ । नेपालगञ्जबाट मुगुको गमगढीका लागि छुटेको भे १ ख १६७ नम्बरको बस पिनामा खोलामा दुर्घटना हुँदा १५ जना घाइते भएका छन् ।
दशैंका लागि घर हिँडेका यात्रु लिएर गमगढी जाँदै गरेको बस पिनामा दुर्घटना भएको जिल्ला प्रहरी कार्यालय मुगुले जनाएको छ । बसमा ३९ जना सवार रहेको प्रहरीले जनाएको छ । बस सडकबाट तीन सय मिटर तल खसेको प्रत्यक्षदर्शीले बताएका छन् ।
प्रहरी निरीक्षक जीवन लामिछानेले घाइते १४ जनालाई समिट एअरको जहाजमा र नेपाली सेनाको हेलिकप्टरमा राखेर ताल्चा विमानस्थलबाट नेपालगञ्ज पठाइएको जानकारी दिए।
उनका अनुसार एक जना बालिकाको जिल्ला अस्पताल मुगुमै उपचार भइरहेको छ। बालिकालाई आफन्तले मोटरसाइकलमै राखेर बालिकालाई जिल्ला अस्पताल पुर्याएका थिए।
