इच्छाखबर संवाददाता
आँबुखैरेनी : तनहुँको आँबुखैरेनीमा बिहीबार बिहानै बोलेरो जीपको ठक्करबाट पैदल यात्रुको मृत्यु भएपछि फरार चालक पक्राउ परेका छन् । पक्राउ पर्नेमा बाग्लुङ गल्कोट ११ का २४ वर्षीय दीपक दर्जी रहेका छन्।
जिपले बिहीबार बिहान सवा पाँच बजे आँबुखैरेनी गाउँपालिका २ बगुवास्थित पृथ्वी राजमार्गमा ठक्कर दिँदा आँबुखैरेनी गाउँपालिका ३ पानीघट्टाका ७९ वर्षीय खड्गबहादुर दर्लामीको ज्यान गएको थियो ।
तर जीप सहित चालक भने फरार रहेको थियो । प्रहरीले सीसीटीभी फुटेजको सहयोगमा शुक्रबार जिप चालकलाई नियन्त्रणमा लिएको इलाका प्रहरी कार्यालय आँबुखैरेनीले जनाएको छ ।
बाग्लुङको बुर्तिवाङबाट बिरामी बोकेर काठमाडौं जाँदै गरेको ध १ ज ७३८ नम्बरको बोलेरो जिपलाई प्रहरीले शुक्रबार नियन्त्रणमा लिएको हो ।
धादिङस्थित बेनीघाटको फुटेज अध्ययन गरेर सोही सवारीको नम्बरसमेत पहिचान गरेपछि प्रहरीले सवारी र चालकको विवरण संकलन गरेको प्रहरीले जनाएको छ ।
