इच्छाखबर संवाददाता
मलेसिया,२५ जेठ । मलेसियामा इदको अवसर पारेर आयोजित सांगीतिक कार्यक्रममा आएका तीन नेपाली कलाकारसहित ३२ जना पक्राउ परेको पुष्टि भएको छ ।
तीन दिनअघि आयोजित सांगीतिक कार्यक्रममा अध्यागमनले छापा मारी नेपालबाट आएका तीन कलाकारसहित आयोजक र मलेसियामै रहेका नेपालीहरु पक्राउ परेका थिए । तर, कति पक्राउ परे भन्ने यकिन भएको थिएन ।
मलेसियास्थित नेपाली दूतावासले हिजो अध्यागमन कार्यालय पुगेर पक्राउ परेका नेपालीको स्थिति बुझेको थियो । नेपालबाट आएका तीन कलाकारसहित ३२ जना पक्राउ परेको जानकारी अध्यागमनले दिएको राजदूत उदयराज पाण्डेले जानकारी दिए ।
एसएसओजी ग्रुपद्वारा आयोजित सो कार्यक्रममा नेपालबाट आएका गायिका सुनिता थेगिम, श्रेया राई, सुजन आङदम्बेसहित स्थानीय कलाकार र आयोजक पक्राउ परेका हुन् ।
मलेसियाको क्वालालम्पुस्थित कोताया कम्पेल्क्समा भएको कार्यक्रममा अध्यागमनले स्थानीय समयअनुसार ३ बजे छापा मारेको थियो । नेपालबाट आएका कलाकारले आफ्नो प्रस्तुति दिन नपाउँदै अध्यागमनले छापा मारेपछि कार्यक्रम नै स्थगित भएको थियो ।
कार्यक्रम स्थलमै प्रहरीले छापा मारेपछि उपस्थित दर्शकहरु त्रसित बनेको थियो ।
मलेसियामा साङ्गीतिक कार्यक्रम गर्न स्थानीय प्रशासनसँग अनुमति लिनुपर्ने व्यवस्था छ । तर, आयोजकले अनुमति नदिएका कारण अध्यागमनले छापा मारेको बुझिएको छ ।
