इच्छाखबर संवाददाता
काठमाडौं, १ बैशाख । प्रधानमन्त्री केपी शर्मा ओलीले आज विहान रारा पुगेर सम्बोधा गरेका छन् ।नयाँ वर्षको अवसरमा आयोजित रारा महोत्सवमा सहभागी हुन मुगुका पुगेका प्रधानमन्त्री ओलीले त्यहीँबाट देशवासीका नाममा सम्बोधन गरेका हुन् ।
सम्बोधनका क्रममा प्रधानमन्त्री ओलीले विधिको शासन कडाइका साथ लागू गर्ने घोषणा गरेका छन् ।उनले स्वतन्त्र न्यायपालिका र लोकतान्त्रिक विधिको शासन स्थापना गरिने बताए ।प्रधानमन्त्री ओलीले आत्मविश्वासको कमी र केही बेथितीहरु हुँदा मुलुकले विकासमा फड्को मार्न नसकेको भन्दै त्यस्ता समस्यालाई सरकारले समाधान गर्ने बताए ।
प्रधानमन्त्री ओलीले नेपाल साधन र स्रोतको धनी रहेको भन्दै अब कुनै पनि हालतमा विकासमा पछि फर्कने अवस्था नरहेको बताए ।भ्रष्टाचारलाई कुनै पनि हालतमा स्वीकार गर्न नसकिने भन्दै प्रधानमन्त्री ओलीले ऐनकानुनमा सुधार ल्याउने घोषणा गरे ।उनले समस्याको समाधान गर्दै विकासको गतिलाई असाधारणरुपमा अघि बढाउने उद्घोष गरे ।
सन् २०३० सम्म मुलुकलाई दिगो विकासको लक्ष्यमा पुर्याउने प्रतिबद्धता व्यक्त गर्दै प्रधानमन्त्री ओलीले आफ्ना योजना कतिपयलाई महत्वाकांक्षी लागे पनि त्यस्ता आकांक्षा विना फड्को मार्न नसकिने बताए ।
त्यसका लागि उत्पादनलाई बढवा दिनुपर्ने उनको भनाइ छ ।प्रधानमन्त्री ओलीले नैतिक आचारण शुरु गराउने बताए । उनले त्यसको शुरुआत आफू र आफू नेतृत्वको मन्त्रिपरिषद्बाट शुरु गर्ने बताए ।अब देशका कुनै पनि नागरिक भोकै मर्नु नपर्ने भन्दै प्रधानमन्त्री ओलीले कृषिलाई उच्च प्राथमिकता राखिने बताए ।
प्रधानमन्त्री ओलीले छिमेकी तथा अन्तर्राष्ट्रिय मित्रहरुसँग विकासमा हातेमालो गर्ने प्रतिबद्धता पनि व्यक्त गरे ।उनले लगानीकर्ताहरुलाई ढुक्क भएर लगानी गर्न आह्वासनसमेत गरे । लगानी गर्दा आउने कुनै पनि अदालती तथा प्रशासनिक अवरोधहरुको सामना गर्नु नपर्ने उनको भनाइ थियो ।
प्रधानमन्त्री ओलीले जलस्रोत तथा उर्जाको विकासलाई सरकारले प्राथमिकता दिने बताए । उनले रेल तथा जलमार्गको विस्तृत खाका सरकारको आगामी नीति तथा कार्यक्रममा ल्याउने घोषणा गरे ।
