इच्छाखबर संवाददाता
धादिङको बेनीघाट रोराङ गाउँपालिका वडा नम्बर तिनले राहात वितरणमा नयाँ शैली अपनाएको छ । देश लकडाउन गरिएपछि ज्याला मजदुरी गर्नेहरुलाई खानाको समस्या परिरहेको बेला वडाले मजदुरहरु लाई दुई दिन काम लगाएर तीस किलोको एक बोरा चामल दिन थालेको छ ।
पहिलो चरणमा ४५० भन्दा बढी परिवारलाई खाद्यान्न र स्वास्थ्य सामाग्री राहात स्वरुप वितरण गरेको वडाले दोस्रो चरणको राहात वितरणमा फरक शैलि अपनाएर खाद्यान्न अभाव भएको परिवारको एक सदस्यलाई २ दिन काममा लगाएर ३० केजीको १ बोरा चामल वितरण गर्न थालेको हो ।
दैनिक जीवन यापनमा समस्या परेका मजदुरहरुको लागि गाउँपालिकाले गरेको २ दिन मजदुरी १ बोरा ३० के जि सोना मन्सुली चामल दिने निर्णय अनुसार यस वडाले १०० जना भन्दा बढीलाई काममा लगाई राहात वितरण गरि सकेको वडा कार्यालयका सचिव केशर भुजेलले बताए ।
वडाले संचालन गरेको २ दिन मजदुरी, ३० के जि सोना मन्सुली चामल अभियान अन्तरगत रिचोकटार कुलो सरसफाई, आँपखर्क बागेश्वरी सडक नाली निर्माण, माथिल्लो वर्वाङ देखि गोमती पुल सम्म गोरेटोबाटो सरसफाई, सुन्धनी गुफा जाने सिढी निमार्ण लगायतको काम भएको सचिव भुजेलले बताए ।
उक्त कार्यक्रमको धादिङका संघीय सांसद भुमी त्रिपाठी, गाउँपालिका प्रमुख पित्तबहादुर डल्लाकोटी, प्रमुख प्रशासकिय अधिकृत लक्ष्मण प्रसाद भट्टराई लगायतले अनुगमन गरेका थिए ।
धादिङपोस्टको सहयोगमा
